Verore dhe politikë në Gjirokastër, Çuçi me votues për herë të parë: Më 25 prill shkruajmë së bashku një histori suksesi të Shqipërisë që ecën përpara

Në Ditën e Verës, drejtuesi politik i qarkut Bledi Çuçi zhvilloi një bashkëbisedim me të rinjtë që votojnë për herë të parë në zgjedhjet e 25 prillit. Në këtë takim Çuçi shoqërohej nga kandidatja tjetër e qarkut Kjara Adhami dhe kryebashkiaku Flamur Golemi. Në postimin e tij në Facebook, Çuçi ka thënë: Vota e herës së parë është mbase ndër ato që mbahen mend më gjatë, prandaj kurrsesi nuk duhet shpërdoruar e as nuk duhet hedhur pa u menduar. Teksa vendosëm verore, patëm edhe një bisedë fantastike me disa të rinj në Gjirokastër që në këto zgjedhje do të votojnë për herë të parë. As për ta nuk ka zgjedhje tjetër më të mirë veç Partisë Socialiste. Prandaj ejani me ne në këtë përpjekje të përbashkët për t’ia bërë më të lehtë të ardhmen Shqipërisë. Merrni një shok të lagjes, një shoqe të klasës, një mik apo mikeshën tuaj dhe më 25 prill shkruajmë së bashku një histori suksesi të Shqipërisë që ecën përpara.