Me humbjen në Shkodër, e para për këtë sezon, Elbasani ka zbritur nga vendi i parë, duke shkuar në të tretin me dy pikë diferencë ndaj Vllaznisë dhe Egnatias që i parakaluan këtë fundjavë.
Në dy sfidat e fundit elbasanasit kanë stonuar paksa me paraqitjet e tyre, fillimisht në barazimin ndaj Teutës dhe më pas humbjen me Vllazninë. Duket se humbi disi ai shkëlqimi i katër javëve të para, por gjithsesi në momentin kur skuadra kishte nevojë për një pauzë të shkurtër që të rimarrë veten, i vjen në ndihmë edhe kalendari, për shkak të pushimit si pasojë e ndeshjeve të Kombëtares.
STARTI – Thuhet shpesh se starti i një kampionati është gjithnjë i rëndësishëm, sepse jep idenë edhe të skuadrave që do të pretendojnë këtë edicion të jenë në rangjet e larta të tabelës. “Panorama Sport” i ka bërë një vëzhgim startit të Elbasanit në gjashtë javët e para, duke krahasuar vetëm dy sezonet e fundit, ku morën pjesë në Superiore dhe në të Parën.
Në start, kanë qenë tre trajnerë të ndryshëm, fillimisht me Nevil Deden, më pas Roberto Bordin dhe së fundmi Ivan Gvozdenoviç. Bie në sy se nisja ka qenë deri-diku pozitive, me verdheblutë që i kanë treguar që në fillim ambiciet e tyre. Kështu, në sezonin 2023-2024 kur ishin pjesë e së Parës, pas gjashtë javësh, elbasanasit koleksiononin 13-të pikë dhe mbanin vendin e dytë në renditje. Në fund të atij sezoni u arritën objektivat, sepse verdheblutë u ngjitën në elitë dhe për më tepër si kampionë.
Në vitin e parë në Superiore, pas gjashtë javësh, elbasanasit patën grumbulluar nëntë pikë dhe mbanin vendin e tretë në renditje. Një start pozitiv, por gabimet rrugës bënë që të mos ishte pjesë e “Final 4”, duke humbur terren që gjithsesi e rifituan në javët e fundit, por nuk e kapën shansin e katërshes me humbjen në finish ndaj Partizanit. E tillë është edhe nisja e këtij sezoni, me Gvozdenoviç që ka marrë dy pikë më pak sesa Dede dhe dy më shumë sesa Bordin. 11-të pikë në gjashtë javë dhe vendi i tretë, e pozicionojnë në një vend të favorshëm, edhe pse kanë pasur mundësinë të ishin më mirë në renditje.
Starti është shpesh ogur i mirë për të arritur objektivat, ndaj mbetet për t’u parë nëse elbasanasit do të dijnë ta mbajnë këtë pozicion dhe këtë ritëm deri në fund apo do të bëjnë gabime rrugës si ai i një viti më parë. Pas disa sfidave të vështira, ekipi ka mundësinë të përdorë pauzën si moment reflektimi, për të përmirësuar dobësitë në mbrojtje dhe sulm.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
