Kandidati i Partisë Socialiste Bledi Çuçi zhvilloi sot një takim me banorët e lagjes së Manalatit në Gjirokastër. Gjatë fjalës së tij, ai vuri në dukje situatën e degraduar ku ishte lënë Gjirokastra gjatë qeverisjes së mëparshme 8-vjeçare, ku rrezikoi seriozisht të hiqej nga lista e trashegimisë botërore nga UNESCO.
“Kur ne shkuam në zyrat e shtetit kemi gjetur letër nga UNSECO, që thoshte se tashmë kupa është mbushur dhe do nxjerrim Gjirokastrën dhe Manalatin nga lista e mbrojtjes, nga UNESCO. Një dëshmi se ku e kishte çuar politika e papërgjegjshme e politikanëve tanë e 25 viteve tranzicion, kujdesin ndaj trashegimise. Por ne, që 2 muajt e parë arritëm të bindim UNESCO-n se ne, PS, qeveria Rama jemi ndryshe dhe kemi ardhur për të ndryshuar fatet e Shqipërisë dhe të Gjirokastrës”.
Çuçi deklaroi se gjatë mandatit të dytë, me përfshirjen e Gjirokastrës në një paketë 71 milionë dollarë nga Banka Botërore, projektet transformuese të Gjirokastrës do të shtrihen në çdo lagje të saj.
“Një lajm shumë i mirë, edhe për lagjen tuaj dhe gjithë Gjirokastrën, eshte se në projektin e fundit të Bankës Botërore janë akorduar 71 milionë dollar vetëm për rehabilitimin e infrastrukturës brenda qyteteve për 4 qytete, dhe 2 prej tyre janë Gjirokastra dhe Përmeti”.
Në përfundim të fjalës së tij, Çuçi kërkoi mandat fuqiplotë për Partinë Socialiste, duke theksuar se PS ka dëshmuar së është e vetmja forcë politike shtetformuese e aftë për të çuar më tej procesin e integrimit europian.
“Ndryshe nga 4 vjeçari që kaloi, ka ardhur koha që shqiptarët t’i besojnë 100 përqind PS dhe Edi Ramës dhe jo një bashkëqeverisje me dikë tjetër në prehër. Unë mendoj se i kemi bindur shqiptarët dhe do vazhdojmë t’i bindim se është e vetmja PS që mund ta bëjë këtë vend, që mund ta bëjë shtet Shqipërinë, që mund ta çojë Shqipërinë në Europë”.
