Gjatë takimit në Bularat me një eurodeputete greke dhe deputetin e LSI-së, Vangjel Tavo, nëna e ekstremistit Kostandinos Kacifas tregon para tyre se është dhunuar nga forcat RENEA. Ajo pretendon se policët i kanë vënë armën në kokë, si dhe i kanë hequr dhunshëm kryqin nga qafa. Nëse këto që ajo thotë janë të vërteta, padyshim që është diçka e rëndë dhe e dënueshme. Prokuroria shqiptare duhet të zbardhë nëse forcat RENEA kanë ushtruar dhunë ndaj prindërve të Kacifas apo jo.
Po qe se kjo rezulton e vërtetë, patjetër që drejtësia duhet të thotë fjalën e vet. Por në çdo rast, edhe dhuna e ushtruar nga RENEA, nuk e justifikon faktin që Kostandinos Kacifas ishte një ekstremist që qëlloi me armë ndaj policisë duke rrezikuar jetën e tyre dhe më pas u ekzekutua pasi nuk pranoi të dorëzohej. Pra, ajo që bëri Kacifas dhe ajo çfarë përfaqësonte ai si ekstremist, duhet ndarë nga dhuna që pretendon nëna e 35-vjeçarit se ka ushtruar policia shqiptare.
Natyrisht që nuk përjashtohet as mundësia që Vasilia Kacifa të gënjejë në deklaratat e saj. Pas ngjarjes, janë shumë aktorë dhe faktorë grekë, brenda e jashtë vendit, që duan ta instrumentalizojnë këtë ngjarje, duke e përdorur politikisht. Kamerat e trupit të RENEA-s, të cilat janë sekuestruar nga Prokuroria, tregojnë gjithçka rreth operacionit. Zbulojnë nëse është ushtruar dhunë ndaj prindërve apo ata gënjejnë? Zbulojnë gjithashtu dhe se si është ekzekutuar ekstremisti Kostandinos Kacifas.
©ArgjiroLajm.net
