Kristian Prenga e nisi në mënyrë të jashtëzakonshme duelin, i cili u zhvillua në Jeddah të Arabisë Saudite, duke surprizuar Anthony Joshuan që në raundin e parë. Boksieri shqiptar e hodhi dy herë në tapet ish-kampionin britanik të botës, duke shkaktuar entuziazëm te tifozët dhe duke treguar se ishte futur në ring pa asnjë kompleks ndaj një prej emrave më të mëdhenj të boksit.
Megjithatë, Joshua reagoi si një kampion me përvojë. Në raundin e dytë ai mori kontrollin e plotë të përballjes, rriti ritmin dhe nisi të ushtrojë presion të vazhdueshëm mbi Prengën. Me goditje të sakta dhe lëvizje më të mira në ring, britaniku përmbysi rrjedhën e duelit dhe nuk i lejoi më kundërshtarit shqiptar të gjente të njëjtin sukses që pati në fillim të sfidës.
Pavarësisht rezultatit, Prenga la një përshtypje shumë të mirë me paraqitjen e tij, sidomos falë fillimit spektakolar që vuri në vështirësi një prej boksierëve më të njohur në arenën ndërkombëtare. Pas përfundimit të ndeshjes, Joshua tregoi edhe një gjest sportiv, duke marrë mbi supe flamurin kuqezi në shenjë respekti për Prengën dhe për shqiptarët. Joshua do të ndeshet në duelin e radhës me “bishën” e ringut, Tyson Fury.
© BalkanWeb
Për t’u bërë pjesë e grupit “Balkanweb” mjafton të klikoni: Join Group dhe kërkesa do t’ju aprovohet menjëherë.
Grupi Balkanweb
