Tre viktima dhe 12 të plagosur. Ky është bilanci sot në rrugët e vendit, që janë përgjakur nga disa aksidente. Viktima e parë u shënua në Lezhë, pranë kryqëzimit të Ishull-Shëngjin. Makina tip “Benz” ku po udhëtonin dy persona doli nga rruga dhe përfundoi në një biznes në anë të saj.
Për pasojë gjeti vdekjen e menjëhershme drejtuesi i mjetit dhe mbeti i plagosur pasagjeri N.P.,i cili është transportuar në spitalin e Traumës.
Ndërkohë që paradite një aksident i mori jetën një të moshuari në Përmet. Sipas policisë në afërsi të fshatit Kutal mjeti tip “Renault” me drejtues M. Sh. 44 vjeç, banues në Këlcyrë përplasi Zh. K., 62 vjeç, i cili udhëtonte me biçikletë. I moshuari humbi jetën në vend.
Një tjetër aksident u shënua pasditen e sotme në fshatin Gjormë në Vlorë, ku ndërroi jetë një 27-vjeçar, drejtuesi i mjetit Akil Ruçaj. Ai humbi kontrollin e makinës duke dalë nga rruga ndërsa u plagos së bashku me pasagjerin. Por pavarësisht se u dërgua me shpejtësi në spital për ndihmë, i riu ndërroi jetë.
Ndërkohë që në mbrëmje në Elbasan si pasojë e përplasjes kokë më kokë të një furgoni me një “Volkswagen cabriole” u plagosën 9 persona. “ABC” sjell pamjet e aksidentit që ndodhi sonte në Elbasan, ku makina tip “Volkswagen” u bë copë copë nga përplasja e fortë, por fatmirësisht nuk pati viktima.