Dy dorezat, të cilat autorët e vjedhjes i harruan në magazinën e pronarit të një kompanie ndërtimi në Dionysos, u gjetën në zonën e bodrumit dhe mund të zbardhin misterin e grabitjes së 30 pikturave të famshme, 200 mijë eurove dhe shumë bizhuterive.
Mediat greke shkruajnë se grupi hetimor vlerëson se në doreza do të gjenden gjurmë gishtash dhe gjurmë ADN-je pas analizimit nga laboratorët e mjekësisë ligjore të Policisë.
Sipas hetimeve të deritanishme, autorët e kishin studiuar mirë vendin pasi e dinin që personi që kishte marrë ambientin me qira, një 67-vjeçar, nuk do të ndodhej aty në ato momente. Ndaj, kanë shfrytëzuar mungesën e tij për të hapur kasafotat dhe për të vjedhur pikturat në bodrum.
Ata kanë çaktivizuar alarmin dhe kanë shkëputur kabllon e telefonit, më pas kanë thyer një dritare dhe kanë hyrë në banjë nga kati i parë i pronës. Pasi kanë kontrolluar ambientet, kanë thyer një kasafortë të mbyllur dhe kanë marrë shumën prej 200 mijë eurosh, bizhuteritë dhe DVR-në e kamëerave të sigurisë
Më pas, autorët kanë zbritur në bodrum dhe kanë thyer dy kasaforta të tjera, në të cilat gjithashtu kanë gjetur para e bizhuteri. Në total u vodhën tridhjetë piktura të piktorëve të njohur, vlera e të cilave nuk është përllogaritur ende.