Deputeti dhe kreu i Partisë Mundësia, Agron Shehaj, rrëfeu sot se çfarë ndodhi gjatë së hënës në zyrat e Kuvendit, ku u përfshi në incidentin e marrjes së dokumentit të Marrëveshjes me SHBA-në para votimit.
Duke folur në “Euronews Albania”, Shehaj u ndal te shtysa për të marrë dosjen, që sipas tij, erdhi si rrjedhojë e nevojës për akses në informacion, ndërsa u justifikua se e ka këtë të drejtë prej detyrës si deputet.
“Më akuzojnë se kam rrëmbyer një dokument. Nuk kam bërë gjë tjetër veçse kam ushtruar të drejtën time. Nëse një e drejtë të mohohet, duhet të veprosh. Duhet ta aksesoja atë dokument, ta lexoja sepse duhet të votoja më pas. Kur më mohohet mua e drejta, si deputet i Republikës së Shqipërisë, imagjino se çfarë i ndodh një qytetari të thjeshtë. Si mund të vjedh një dokuemnt që duhet të më jepej. Dhjetë minuta para, u tha se e gjenim në Kuvend. Të drejtat e një deputeti nuk i vendos një sekretare. Këta janë mësuar me deputetë kukulla që komandohen se çfarë dhe si duhet të thonë. Nuk më bëhet qejfi të përplasem me gardën”,-tha Shehaj.
