Bashkia Gjirokastër ka hapur një tender me vlerë të konsiderueshme. Objekti i tenderit është ‘Blerje karburant makine/korrje/ngrohje, për nevoja të bashkisë dhe institucioneve të varësisë’. Sipas dokumenteve që siguron ArgjiroLajm.net vlera e tenderit është rreth 147 milionë lekë të vjetra me TVSH. Por nuk specifikohet periudha se kur do të përdoret kjo sasi karburanti. A është për gjithë vitin kalendarik apo për një periudhë më të vogël. Afati për pranimin e ofertave është deri më datë 23 shkurt 2018.
Një tender me të njëjtin objekt ka hapur edhe Bashkia Tepelenë. Fondi i vënë në dispozicion për blerje karburanti për nevoja të bashkisë është rreth 61 milionë lekë të vjetra me TVSH. Pra, Tërmet Peçi është treguar më gjirokastrit kur vjen puna tek shpenzimet për karburant, krahasuar me Zamira Ramin. Por mbase kjo e fundit shpenzon më shumë duke qenë se Gjirokastra është një bashki më e madhe. Në tenderin e Bashkisë Tepelenë specifikohet se karburanti do të përdoret për 10 muajt e ardhshëm.
©ArgjiroLajm.net
