PD dhe LSI nuk janë thjesht dhe vetëm në një koalicion opozitar për të rrëzuar qeverinë ‘Rama 2’, por kanë nisur të ndajnë edhe pushtet me njëra-tjetrën në nivel vendor. Të paktën nëse i referohemi Bashkisë Gjirokastër, ku së fundi kryebashkiakja Zamira Rami ka firmosur emërime të njerëzve nga radhët e PD-së. Konkretisht mësohet se në krye të njësisë administrative Lazarat është emëruar Benard Pollo, i cili mban njëkohësisht postin e kryetarit të PD-së në Lazarat. Pollo zëvendëson kështu Mexhit Jupin e shkarkuar nga Rami pak javë më parë.
Jupi ishte emëruar si përfaqësues i PS-së që prej korrikut 2015 kur Rami mori drejtimin e Bashkisë Gjirokastër. Asokohe PS dhe LSI ishin ende në koalicion. Lëvizja e fundit e kryebashkiakes së Gjirokastrës sigurisht nuk është një vendim vetëm i saj, por fsheh kalkulime më të gjera politike në funksion të së tashmes dhe patjetër të zgjedhjeve të ardhshme lokale. E thënë më thjeshtë, Zamira Rami kërkon të ruajë mbështetjen e PD-së në Këshillin Bashkiak, në një kohë kur rrezikon të humbasë shumicën nga largimi i këshilltarëve të saj.
Tjetra, asaj i duhet PD-ja për betejën e vitit 2019, ku sipas të gjitha gjasave Rami do të kërkojë një mandat të dytë në krye të Bashkisë Gjirokastër. Ndonëse mbetet për t’u parë nëse Partia Demokratike do t’ja japë Gjirokastrën LSI-së apo do të nxjerrë një kandidat të vetin. Kujtojmë që në vitin 2011 PD mbështeti kandidatin e LSI-së, i cili humbi përballë Flamur Bimes. Emërimi i Benard Pollos si administrator i Lazaratit, me siguri do të shoqërohet edhe nga emërime të tjera nga radhët e njerëzve të PD-së në Gjirokastër.
Ka zëra që flasin edhe për një nënkryetar bashkie nga radhët e PD-së, por sidoqoftë duhet të presim. Ajo që dallohet lehtësisht është qasja krejt tjetër që PD ka marrë ndaj Zamira Ramit. Tonet ndaj saj në Këshillin Bashkiak janë zbutur, madje PD u bë iniciatore e një peticioni që mbështeste kërkesën e Ramit ndaj qeverisë për shpalljen e gjendjes së jashtëzakonshme në Gjirokastër.
©ArgjiroLajm.net
