Ministri i Brendshëm Fatmir Xhafa paralajmëroi “një operacion të gjerë me përfshirjen e të gjitha agjencive ligjzbatuese” kundër organizatave kriminale.
Në një aktivitet nga Ministria e Brendshme, Xhafa foli edhe për zbarkimin në Tiranë të ekspertëve të FBI-së dhe atyre gjermane, që do asistojë policinë shqiptare.
“Në fillim të nëntorit vijnë ekspertë të FBI dhe ministrisë federale të Gjermanisë dhe në vijim duke punuar së bashku do a ndihmojnë për kapjen e drejtuesve dhe anëtarëve të organizatave kriminale… Së bashku, prej 2 muajsh, kemi punuar për një plan ambicioz për një operacion i gjerë me përfshirjen e të gjitha agjencive ligjzbatuese”, tha ministri.
Xhafa foli edhe vetingun në polici dhe shkarkimet e fundit masive.
“Masat disiplinore, në përputhje me ligjin, të marra nga drejtuesit e policisë së shtetit, gjatë kësaj periudhe të qënies sime në drejtimin e Ministrisë së Brendshme, kanë qenë në disa raste radikale. Por gjithsesi ato kanë qenë të domosdoshme dhe në raport plotësisht të drejtë me dëmin e shkaktuar, si dhe janë në përputhje me qëllimin imediat për forcimin e rendit e të sigurisë, si dhe kthimin e besimit të qytetarit tek policia”, deklaroi ministri.
“Synojmë të pastrojmë policinë nga njerëzit e korruptuar, theksoi ministri… theksoj se procesi i vetingut para së gjithash synon të promovojë djem e vajza, burra e gra profesionistë, që shërbejnë e drejtojnë në polici.”
