Të shtunën e 23 Marsit socialistët do të mbledhin Kongresin. Kryesia e PS e mbledhur nga kryeministri Edi Rama këtë të hënë ka miratuar axhendën e Kongresit që është konceptuar si i ndarë në 3 sesione.
Ka mundësi që në këtë Kongres, ku çdo bashki do të përfaqësohet me 700 deri në 1000 delegatë dhe të ftuar që do të përshkojë bulevardin “Dëshmorët e Kombit” në këmbë për t’ju drejtuar pallatit të Kongreseve (një formë anti-mitingu) të bëhen publik dhe emrat e kandidatëve për zgjedhjet e ardhshme lokale.
Deri tani gjatë aktiviteteve “Bashkia që duam”, Rama i ka konfirmuar disa emra. Në kryeqytet Erion Veliaj, në Fier do të jetë sërish Armando Subashi dhe në Vlorë, Dritan Leli.
Për qytetin e Shkodrës dëshirën e ka shprehur ish-zëvendës kryeministrja Senida Mesi, njësoj si për qytetin e Lezhës që dëshirën e ka shprehur deputeti Pjerin Ndreu.
Për në Berat, në takimet e fundit krah kryeministrit është shfaqur ish-zëvendës ministri i Arsimit dhe Sportit, Ervin Demo, megjithatë nuk ka ende një konfirmim zyrtar.
Në Elbasan duket se Qazim Sejdini mbyll ciklin e tij dhe i lë vendin prefektit aktual, Gledian Llatja. E njëjta situatë duket dhe për qytetin bregdetar të Durrësit, që më shumë gjasa Vangjush Dako nuk do të jetë më. Për këtë qytet dëshirën ka shprehur publikisht djali i deputetit socialist Spartak Braho.
