Mungesa e hidranteve të ujit në zonën muzeale vijon të mbetet një problematikë e pazgjidhur për qytetin e Gjirokastrës. Realizimi I investimit prej 4.5 milion euro për furnizimin e qytetit të Gjirokastrës me ujë të rrjedhshëm, pritej të jepte zgjidhjen përfundimtare të kësaj problematike, por ky investim që solli vendosjen e hidrantëve në disa lagje të qytetit që prej vitesh vuanin mungesën e tyre, nuk ka gjetur ende shtrirje në zonën muzeale.
Kreu I shërbimit zjarrfikës në Gjirokastër, Kujtim Bizhga pohon se ndonëse ka patur një shtim të nhdjeshëm të hidrantëve pas investimit të ri të ujësjellësit, në zonën muzeale hidrantët e vjetër janë jashtë funksionit, ndërsa po kaq jofunksionalë bëhen edhe hidrantët e rinj në qytet, për të cilët mungon shpërndarësi I ujit.
Ndërtimi arkitektonik i Gjirokastrës me shtëpitë shumë pranë njëra – tjetrës dhe ndërtim më dru, lehtëson shpërndarjen e flakëve me shpejtësi nga njëra banesë tek tjetra në rast zjarri. Bizhga thotë se është ndërtuar një hydrant model duke shfrytëzuar traditën e puseve familjare gjirokastrite, I shfrytëzueshëm nga vetë banorët.
Por problemet duket se nuk mbarojnë me kaq në Gjirokastër. Rrugicat e ngushta të lagjeve të kalldrëmta pengojnë kalimin e makinave zjarrfikëse që jo rrallë detyrohen të rrinë larg vatrës së zjarrit dhe të mos mundin të ushtrojnë shuarjen drejtpërdrejt të godinës. Zjarrfgikësit e Gjirokastrës ripërsërisin apelin për një automjet zjarrfikës me përmasa më të vogla, I përshtatshëm për ndërhyrje në rrugët e ngushta të qytetit muze.
Hidrantet e ujit në Gjirokastër kanë qenë jofunksionalë prej më shumë se 20 vitesh. Pjesa më e madhe e tyre janë shkatërruar ose vjedhur për skrap. Tre vjet më parë 11 hidrantë u vendosën në zonën muzeale, ndërsa sot shumë pak prej tyre janë funksionalë. Deri në fillim të viteve ’90 në qytetin e Gjirokastrës numëroheshin mbi 30 hidrantë, ndërsa vitet e fundit nuk kanë munguar rastet kur banesat në zonën muzeale janë shkrumbuar nga zjarri si pasojë e mundësive të pakta të qarkullimit të zjarrfikëseve në zonën muzeale dhe mungesës së hidranteve.
