Shqipëria nuk ka dalë nga harta e vendeve që kultivojnë kanabis, por policia po fsheh operacionet për asgjesimin e bimëve narkotike të mbjella. Kështu deklaroi në studion e “Intervista e Ditës” me Erjon Çikun, gazetarja e kronikës në News24 Dorjana Bezat.
Ajo solli në vëmendje disa raste, që sipas saj janë fshehur nga policia. Një rast i përket qarkut Gjirokastër. Konkretisht në një fshat malor të Bashkisë Dropull. Për gazetaren Dorjana Bezat shifrat që jep policia janë, artificiale pasi numri i bimëve të kultivuara është 2 ose 3 herë më i madh, kjo sepse policia i fsheh operacionet antikanabis. Rasti më i fundit është operacioni i ndodhur në fshatin Skore të bashkise Dropull, ku më 16 korrik gjatë një operacioni u gjetën 6 karcela me kanabis dhe u asgjesuan rreth 2300 bimë.
Për këtë rast një ditë më vonë policia arrestoi edhe 2 persona si të dyshuar, thotë gazetarja, duke shtuar se asnjë nga këto të dhëna nuk u bë publike nga policia as në njoftim për shtyp dhe as u publikua në komunikatën zyrtare në faqen e Policisë së shtetit./BW
