Pas një beteje 8-vjeçare për mbrojtjen e “Zemrës blu të Europës”, qeveria shqiptare dhe kompania aktiviste Patagonia nënshkruan të hënën një marrëveshje bashkëpunimi për projektin përgatitor “Vjosa –Park Kombëtar”.
Marrëveshja u nënshkrua në praninë e aktivistëve shqiptarë dhe ndërkombëtarë nga ministrja e Mjedisit, Mirela Kumbaro dhe drejtori ekzekutiv i Patagonia, Ryan Gellert.
Si një prej kompanive ndërkombëtare të përfshira në fushatën “Të shpëtojmë zemrën blu të Europës”, Patagonia përfaqëson në këtë marrëveshje zërin e aktivistëve dhe organizatave mjedisore të cilat luftuan për mbrojtjen e lumit nga digat dhe shpalljen e tij park kombëtar.
Sipas ministres Kumbaro, qeveria ka filluar planet për shpalljen e Vjosës si Park Kombëtar që prej vjeshtës së vitit të kaluar, duke e cilësuar Vjosën si një laborator të mirëfilltë si për shkencëtarët, ashtu edhe për vendasit.
Kumbaro tha gjithashtu se komunikimet me “Patagonia-n” nisën në mandatin e tretë të qeverisë “Rama”, duke i dhënë kështu kredite ekzekutivit për këtë nismë. Pas fjalës së saj, Kumbaro nuk pranoi pyetje nga gazetarët.
Drejtori ekzekutiv i Patagonia, Ryan Gellert premtoi se marrëveshja e bashkëpunimit për planifikimin e parkut kombëtar të Vjosës do të shërbejë si shembull për Europën.
“Kërcënimi më i madh ndaj natyrës është supozimi se dikush tjetër do t’a mbrojë atë,” tha Gellert, ndërsa u bëri thirrje aktivistëve dhe qeverisë shqiptare që të dalin sa më parë në mbrojtje të pasurive natyrore.
I pranishëm në ceremoni, kryeministri Edi Rama i dha merita qeverisë së tij për mbrojtjen e Vjosës dhe ironizoi fushatën e gjatë të aktivistëve – mes të cilëve edhe aktorin Leonardo Di Caprio.
“Ne e vendosëm Vjosën në mbrojtje, pasi e kthyem në zonë të mbrojtur për të mos lejuar ndërtimin e hidrocentraleve që ishin planifikuar,” tha Rama, pa përmendur faktin se qeveria e tij miratoi në vitin 2016 dhënien me koncesion të HEC Poçemit në favor të kompanive turke.
“Leonardo di Caprio u bë i gjallë për të goditur qeverinë, por nuk u bë i gjallë për ta mbështetur qeverinë,” tha Rama, i cili e quajti më tej aktorin hollivudian si “Nardi”.
Rama tha se me shpalljen e Vjosës Park Kombëtar do të ndalohet ngritja e çdo biznesi apo veprimtarie ekonomike që mund të cënojë lumin e egër. Sipas tij, përfitimi në këtë rast do të jetë më i madh sesa ai i bazuar në projektet në dëm të Vjosës./ BIRN
