Vrasja e Klodian Rashës nga efektivi i “Shqiponjave”, Nevaldo Hadëraj, ka ndikuar tek e gjithë e Policia e Shtetit. Një rast e sjell edhe avokati Adriatik Lapaj, i cili tregon një histori të ndodhur ditën e sotme, në një shkëmbim në rrugë me një efektiv të të njëjtës njësi.
Me anë të një postimi në rrjetet e tij sociale, Lapaj shkruan se ishte shkëmbyer me efektivin, i cili i shqetësuar nga reagimi i avokatit ishte ndjerë në siklet.
“U shkëmbeva në parkim duke ecur në këmbë me një polic të forcave “Shqiponja”. Ishte si në siklet. Pak më tej po e prisnin 7-8 kolegë. Me gjasa po merrnin turnin për protestën. Tek po afrohej e pashë fort në sy…më foli me shumë respekt. Na duhet luftë e pakompromistë me elementet negativ në Policinë e Shtetit dhe mbështetje e pakufijshme për ata që e mbajnë me dinjitet atë uniformë. Kaq e thjeshtë është,”-shkruan avokati.
Klodian Rasha u vra një javë më parë nga një efektiv i Policisë së Shtetit. Vrasja e tij solli dorëheqjen e ministrit të Brendshëm, Sandër Lleshaj dhe protesta masive nga qytetarët. Këta të fundit kërkojnë edhe lirimin nga detyra të kryepolicit, Ardi Veliu. Megjithatë kërkesa e tyre është hedhur poshtë nga kryeministri, Edi Rama.
