Pasi Lulzim Basha e caktoi sërish drejtues politik të Partisë Demokratike në Gjirokastër, Tritan Shehu ka nisur intensivisht fushatën elektorale në Gjirokastër dhe është gjëja më normale që bën. Edhe pse ne i qëndrojmë asaj që kemi thënë prej fillimit se ai s’mund të udhëheqë dot PD-në drejt një rezultati më të mirë se dy palë zgjedhjet e kaluara që ka humbur, le të analizojmë pak atë që po ndodh në këto ditë të para të fushatës. Mjafton të shohësh takimet që publikon Tritan Shehu për të kuptuar se s’ka asgjë të re, nuk ka një frymë dhe as fytyra të reja që i atashohen PD-së në këtë betejë për ‘jetë a vdekje’. Tritan Shehu shoqërohet po nga Dasho Aliko dhe i njëjti grup që s’kanë çfarë bëjnë tjetër pasi duket sikur fatin e kanë të lidhur me PD-në. Mban monologun e zakonshëm në çdo takim duke lëshuar herë pas here edhe thagma që gajasin dynjanë.
Nuk shikon një të ri apo të re ose qoftë edhe ndonjë grua që të afishohet si fytyrë e re në PD, qoftë dhe për “garniturë” si për të krijuar iluzionin se po vjen një frymë e re. Madje në fushatën e vitit 2017 dukej se kishte pak më shumë entuziazëm te PD Gjirokastër krahasuar me këtë fushatë. Edhe Roland Bejko që të paktën formalisht pati deklaruar se do të mbështeste PD-në në Gjirokastër, në këto ditë të para nuk ka qenë prezent në asnjë takim të Tritan Shehut në qark. Dje pati deklaruar se ishte i habur pse Lulzim Basha nuk respektoi vendimin e komisionit për skualifikimin e Tritan Shehut nga gara. Nëse Vangjel Tavo hyn në listën e PD-së, gjasat janë që të shtohet indiferenca dhe zhgënjimi në radhët e mbështetësve të PD-së.
Dhe kur mungon entuziazmi e fryma së pari në radhët e militantëve, mendoni se sa e vështirë është të bësh për vete votuesit e zakonshëm që nuk militojnë në asnjë forcë politike sado që mund t’ua ketë sjellë Rama në majë të hundës. PD nuk pritet të marrë në Gjirokastër një rezultat më të mirë se në zgjedhjet e kaluara edhe për shkak se Basha e la qarkun sërish në dorë të Tritan Shehut, që s’ka asnjë lidhje me gjeneratën e sotme dhe as me nevojën emergjente që PD-ja të ringrihet e të frymëzojë për ndryshim. Tritan Shehu punon thjesht për mandatin e vet, se edhe po të dojë më tepër, nuk i sjell dot asgjë të re PD-së së vitit 2021. Kështu që është e kotë t’i kërkosh diçka më tepër.
©ARGJIROLAJM.net
