Policia e Shtetit ka reaguar për incidentin pranë selisë së Partisë Demokratike, duke dhënë versionin e saj për ndërhyrjen e efektivëve në zonë. Sipas Policisë, një grup personash të maskuar, pasi sulmuan efektivët me molotovë, u futën në ambientet e jashtme të selisë së PD-së për t’iu shmangur kapjes dhe vijuan sulmin prej andej.
Policia thotë se efektivët iu përgjigjën me gaz lotsjellës, ndërsa i cilëson si “të pavërteta, të qëllimshme dhe dashakeqe” pretendimet e tjera për mënyrën se si u zhvillua ndërhyrja.
REAGIM I POLICISË SË SHTETIT
Nga patrullimet në terren për ruajtjen e rendit dhe sigurisë, sqarojmë se:
Shërbimet e Policisë janë sulmuar me molotovë nga një grup personash të dhunshëm dhe të maskuar, të cilët, për t’i shpëtuar ndjekjes dhe kapjes nga ana e Policisë, u futën në ambientet e jashtme të selisë së subjektit politik Partia Demokratike dhe vijuan sulmin ndaj punonjësve të Policisë.
Shërbimet e Policisë iu përgjigjën sulmit me molotovë nga ana e protestuesve të dhunshëm me gaz lotsjellës.
Të gjitha pretendimet e tjera janë të pavërteta, të qëllimshme dhe dashakeqe, me qëllim fshehjen e së vërtetës.
