Ministrja Elisa Spiropali theksoi përballë gazetares Juli Xhokaxhi në ABC, se nuk ishte kundër zgjedhjevelokale të parakohshme nëse vendoset nga Gjykata Kushtetuese.
“Nuk jemi kundër zgjedhjeve të parakohshme lokale nëse e vendos Gjykata Kushtetuese”, tha Spiropali.
Ndërkohë gjatë intervistës me gazetaren Juli Xhokaxhi, Spiropali nuk hodhi akuza ndaj opozitës sikundër jemi mësuar ta dëgjojmë, por vlerësoi fushatën e bërë nga kjo forcë politike për zgjedhjet e 25 prillit.
“PD ka bërë një fushatë të mirë. Bash për hir të vërtetës ka qenë i arsyeshëm. PD është rritur ka marrë maksimumin që mund të merrte. Edhe ne do të bëjmë analizë edhe ata duhet të bëjnë analizë, por që PD të vrapojë drejt mosnjohjes së zgjedhjeve është rruga e sigurt e humbjes”, u shpreh Spiropali.
Ndërsa u pyet për deklaratat e Kreut të Partisë Demokratike i cili i konsideroi zgjedhjet e 25 prillit, krim zgjedhor, Spiropali u shpreh se duhet të ndiqen procedurat dhe se në asnjë moment qeveria nuk ka penguar autoritetet të hetojnë.
Sa i përket kërkesës së kryeministrit Edi Rama për bashkëpunim e me liderin e opozitës, ajo theksoi se tashmë në këtë mandat të tretë ka ardhur koha që partitë politike t’i lënë pas “llogoret” e së shkuarës, por për të ardhmen e vendit dhe për rrugën drejt Bashkimit Europian.
