Prej gati tre orësh vijon operacioni policor në Tepelenë për kapjen e autorit apo autorëve të vrasjes së 45-vjeçarit Çajup Selimi, i cili u ekzekutua në rrethana të paqarta mbrëmjen e së martës. Forca të shumta të patrullës “Shqiponjat” dhe oficerë të hetimit të krimit ndodhen në Tepelenë për krehjen e zonës dhe ngritjen e postblloqeve në rrugët kryesore e jo vetëm, derisa të bëhet i mundur lokalizimi dhe kapja e autorit/autorëve. Në terren është edhe kreu i policisë së Gjirokastrës, Fatmir Hoxha.
Ngjarja e rëndë ndodhi në lagjen “15 Shtatori”. Fillimisht 45-vjeçari mbeti i plagosur dhe u dërgua në spitalin e Gjirokastrës për ndihmë mjekësore, por për shkak të plagëve të marra nuk arriti dot të mbijetonte. Rezulton që viktima të jetë pronar i një biznesi materialesh ndërtimi. Tre vite më parë është goditur me mjete të forta nga dy persona në qendër të qytetit të Tepelenës. Konkretisht në vitin 2018 ai do të goditej me leva hekuri dhe me grushte për arsye të paqarta, por dyshimet kryesore ishin për konkurrencë për tregti. ©argjiroja.net