Prej më shumë se një muaj, RTSH bën reklamë se ka të drejtën ekskluzive të transmetojë Kampionatin Europian.
Dhe normalisht, pas ndeshjes së djeshme Itali-Turqi, të gjithë u rehatuan këtë mesditë para televizionit, për të parë ndeshjen e radhës, Zvicër-Uells.
Por, shikuesit u përballën me një surprizë: RTSH seç ritransmetonte një festival klipesh.
Epo të gjithë, duke menduar se do kishte ndonjë gabim, e çuan tek RTSH Sport.
Por aty jepet një ndeshje tenisi.
Askush nuk dinte të jepte një përgjigje, se pse nuk po e jepte RTSH ndeshjen.
Dhe për t’u sqaruar, shumë njerëz kanë hyrë në internet, për të parë programin e RTSH-së.
Aty nuk flitej asgjëkundi për ndeshje, me përjashtim të darkës, kur do të transmetojë ndeshjen Belgjikë-Rusi.
Pra, sot morëm vesh, se në fakt RTSH nuk do e transmetojë Kampionatrin Europian, ose më saktë, do të transmetojë vetëm ndeshjen e darkës.
Dhe këtë duhej ta merrnim vesh vetëm ditën e dytë të kampionatit, ndërkohë që gjithë televizionet kombëtare e kanë detyrim transmetimin e evenimenteve ndërkombëtare.
Nuk dimë se çfarë ka ndodhur në këtë rast me RTSH-në, e cila nuk jep asnjë sqarim përse nuk i jep ndeshjet e Europianit.
Normalisht, televizioni publik në gjithë botën ka të drejtën për të blerë evente të tilla si Kampionati Europian dhe ai Botëror, dhe shihet me prioritet nga UEFA, që shet të drejtën televizive.
Por në Shqipëri ndodhin çudira dhe edhe këtë Europian, pë rata që nuk iu kap Rai-n italian apo RTK-në e Kosovës, do t’i ndjekin ndeshjet në Radio Tirana.
Ah po, vonë në darkë, në RTSH mund të shihni analizat e Çim Muçës për ndeshjet që janë zhvilluar gjatë ditës dhe të cilat i kemi ndjekur në Radio Tirana!
(TemA)
