Prishja e koalicionit PS-LSI në nivel të qeverisjes qëndrore, me siguri që do të prekë edhe bashkëpunimin në nivel vendor mes këtyre dy partive. Socialistët kanë nisur të largojnë nga puna, në bashkitë që ata drejtojnë, të emëruarit prej LSI-së. Sot raportohet për shkarkime në Bashkinë Korçë e Maliq, ndërsa priten shkarkime edhe në bashki të tjera.
Ndërkohë me po të njëjtën mënyrë do të jetë edhe reagimi i LSI-së në bashkitë që ajo drejton vetë. Një prej tyre është edhe Bashkia Gjirokastër. Për momentin nuk ka ende sinjale për shkarkime nga Zamira Rami, por pritet që kjo të ndodhë në muajt e ardhshëm.
Të prekur nga shkarkimet do të jenë edhe administratorët e njësive administrative. Në Bashkinë Gjirokastër, PS ka 4 prej 6 administratorëve, si dhe një nënkryetar. Pa harruar shumë nëpunës të tjerë të mbetur që nga koha e Flamur Bimes dhe që njihen si përkrahës të PS-së. Muaj më parë Zamira Rami shkarkoi në mënyrë të beftë nënkryetarin Ylli Muho, i propozuar nga PS në këtë post. Sigurisht që shkarkimet s’mund të bëhen pa autorizimin e deputetit Vangjel Tavo, pushteti i të cilit është absolut në Bashkinë Gjirokastër.
Një arsye tjetër për shkarkime nga radhët e socialistëve në Bashkinë Gjirokastër, përveç ‘hakmarrjes’ politike, është gjithashtu nevoja për vende të lira pune, në mënyrë që LSI të sistemojë njerëzit e vet tani që ajo s’ka për të qenë më në qeveri.
Prishja e koalicionit pritet të sjellë edhe krisje të mëdha në këshillat bashkiake, pasi PS nuk e bën dot shumicën pa votat e LSI-së. Rrjedhimisht shumë vendime nuk mund të kalojnë. Por burimet thonë se të majtët po punojnë për “trafikim” këshilltarësh nga të gjitha forcat politike në opozitë për të shpëtuar kështu kolapsin në marrjen e vendimeve në këto këshilla.
/ArgjiroLajm.net/
