Fluks në Kakavijë, ja dokumentet që kërkon pala greke për të kaluar kufirin

Lehtësimi i masave antiCovid, në pikën kufitare të Kakavijës ka shtuar edhe fluksin e lëvizjeve. Ditën e djeshme në këtë pikë kufitare u regjistruan radhë të gjata automjetesh në pritje, ndërsa pala greke vazhdon me masa të shtrënguara anticovid dhe me numër të reduktuar sportelesh. Raportohet se në 24 orët e fundit nga kjo pikë kufitare kanë dalë 1088 persona. Mësohet se dita e sotme ka nisur me fluks lëvizjesh, ndërsa pavarësisht se u dha njoftimi për lejimin e autobusëve, sërish janë regjistruar probleme me qarkullimin e tyre. Sakaq, në një komunikim me palën shqiptare, nisur edhe nga temperaturat e larta të motit, ka patur një reagim nga pala greke duke shtuar një sportel më tepër. Sot, edhe pse ka fluks situata duket më e qetë, ndërsa nuk janë shënuar radhë te gjata. Për të shmangur cdo problematikë në dalje, udhëtarët duhet të dinë dokumentet që të kenë me vete. Bëhet fjalë për formularin PLF, certifikaten e vaksinimit, si dhe testin e vaksinimit të 48 orëve të fundit. Pala greke ndërkohë kryen edhe vetë teste të shpejta e të rastësishme në doganë. Deri në datën 28 do të vazhdojë regjimi që përmes Kakavijës mund të kalojnë për në Greqi 1500 persona në ditë.