Komisioni i Posaçëm Parlamentar për Reformën Administrativo-Territoriale ka hyrë në fazën e dytë të punës së tij, duke kërkuar një buxhet të posaçëm prej 25 milionë lekësh (afërsisht 250 mijë euro) dhe angazhimin e 30 ekspertëve të jashtëm.
Sipas dokumentit zyrtar, kërkesa është drejtuar Kryetarit të Kuvendit, Niko Peleshi, nga kryetari i këtij komisioni, Arbjan Mazniku.
Faza e dytë e reformës mbështetet në tri shtylla kryesore — funksionet, financat vendore, si dhe qeverisja e rajonalizimi — të cilat do të ndahen në 5 grupe pune.
Buxheti i kërkuar prej 25,000,000 lekësh (rreth 253,800 euro) ndahet në tre zëra kryesorë:
* Grupi i ekspertëve: 16,200,000 lekë (rreth 164,467 euro) për angazhimin e 30 ekspertëve (nga 6 për secilin grup pune).
* Eventet publike: 6,800,000 lekë (rreth 69,036 euro) për të paktën 3 evente të mëdha logjistike jashtë ambienteve të Kuvendit për procesin e konsultimit.
* Udhëtime, media dhe mbështetje: 2,000,000 lekë (rreth 20,305 euro) për shpenzime operative dhe komunikimi.
Ndërkohë, zhvillimet rreth këtij komisioni vijnë në një kohë tensionesh politike. Dje është mbajtur mbledhja e parë e komisionit të dytë, ku Partia Demokratike (PD) ka zgjedhur ta bojkotojë atë.
