Dasho Aliko ka folur mbrëmjen e sotme te emisioni i Ylli Rakipit për atë që ai e quan sulm i Roland Bejkos dhe mbështetësve të Lulzim Bashës ndaj selisë së PD-së. Aliko thotë se lajmin e mori vesh teksa ishte rrugës për Lunxhëri.
“Ishim rrugës për Lunxhëri, por na lajmëroi njeri që kanë sulmuar selinë e PD-së. Ne u kthyem, ata e morën vesh që ne po vinim dhe ata lanë mbledhjen në mes dhe u larguan. Ndihem i keqardhur që ky veprim është bërë nga ish-kryetari i PD-së në Gjirokastër, Roland Bejko. Nuk erdhi askush nga policia, morëm 129 i njoftuam. As sot s’na ka marrë njeri të interesohet”, tha Aliko.
I pyetur nga Ylli Rakipi për lidhjen që ka me Roland Bejkon, Dasho Aliko u shpreh.
“Po, Roland Bejkon e kam nip. E kam rritur unë dhe byrazeri im se nëna e tij ka vdekur shpejt dhe ai ngeli jetim. Zotin Bejko e kam rritur unë me byrazerin tim. Ndihem i keqardhur që ai nuk vjen dot në Lazarat, që nuk vjen dot në Gjirokastër të pijë kafe”, tha Aliko.
Në vijim të deklaratës së tij, Aliko ka thënë me ironi se sonte Bejko është në një studio tjetër televizive.
“Varet ku e ka porositur Lulzim Basha të jetë i pranishëm”.
Më tej ai e cilësoi Bejkon edhe si provokator, duke iu referuar incidentit me të në protestën e 8 janarit. Sipas Alikos, Bejko e ka provokuar vetë atë skenë. E po kështu sipas tij edhe shkrimin e botuar një ditë më parë nga “Jeta osh qef” për akuzat me një tender të Postës Shqiptare, Aliko tha Roland Bejko mund të ketë sajuar vetë.
Por Roland Bejko teksa ishte në emisionin “Open” i ka nisur një sms Ylli Rakipit ndërkohë që në linjë ishte ende Dasho Aliko.
“Po më thonë që ish-kryetari i PD Gjirokastër me analfabetizmin e tij po më akuzon për shqyerjen forcërisht të derës së PD, etj. Ai turpin nuk e njeh, ka kohë. Së pari, ai tipi është shkarkuar dhe nuk ka të drejtë legale mbi administrimin e asaj selie. Së dyti, nëse unë kam bërë një veprim të tillë, i ftoj të më denoncojnë në organet e drejtësisë. Ndryshe do t’i padis unë për shpifje”, ka qenë mesazhi i Roland Bejkos si replikë ndaj dajës së vet, i pozicionuar në kampin e “Foltores” me Sali Berishën.
