Parakalimi i gabuar i bërë nga makina tip “Opel Zafira” me drejtues 43 vjeçarin, Gerti Skënderaj është shkaku i aksidentit tragjik në Fier, që i mori dje jetën 3 personave. Policia njofton se është arrestuar Gerti Skënderaj për shkelje të rregullave të qarkullimit rrugor, i cili aktualisht ndodhet në gjendje kritike për jetën në reanimacionin e spitalit të Fierit. Të lënduar nga aksidenti gjithashtu kanë mbetur gjithashtu bashkëshortja dhe e bija e Gerti Skënderaj, të cilat ishin në makinë në momentin e aksidentit tragjik.
“Specialistët e Sektorit të Qarkullimit Rrugor në DVP Fier arrestuan në flagrancë shtetasin G. (M). S., 43 vjeç, banues në Cakran, Fier, për veprën penale “Shkelja e rregullave të qarkullimit rrugor”, pasi në datën 09.06.2022, rreth orës 20:20, në fshatin Buzëmadh, duke drejtuar automjetin tip “Opel Zafira”, është përplasur me automjetin tip “Ford”. Për pasojë është dëmtuar vetë drejtuesi i mjetit tip “Opel Zafira”, bashkëshortja e tij, shtetasja G. M. dhe vajza e tyre 6 vjeçe, si edhe kanë ndërruar jetë shtetasit S. L., F. L. dhe B. S., të cilët udhëtonin me automjetin tip “Ford”.”, njofton policia.
