Opozita kërkon që Shqipëria të ketë 80 deri në 90 bashki, si ndarja me e drejtë territoriale për të garantuar shërbime dhe investime për qytetarët. Bashkëkryetarja demokrate e komisionit të posaçëm për reformën territoriale Dhurata Çupi, sqaron se javën e ardhshme do të publikohet drafti i opozitës për numrin e bashkive dhe kufijtë e tyre.
Sipas Çupit reforma e vitit 2014 ka dështuar dhe në 11 qarqet e vendit duhet të ndërhyhet për të rritur numrin e bashkive, duke përjashtuar Gjirokastrën, e cila në këndvështrimin e opozitës ka numrin e mjaftueshëm të njësive vendore edhe pse duhet thënë që të paktën 3 prej bashkive si Këlcyra, Memaliaj e Libohova do të ishin më funksionale po të bashkoheshin përkatësisht me Përmetin, Tepelenën e Gjirokastrën.
Çupi gjykon se duhet të preken edhe qarqet të cilat janë të parashikuara në kushtetutë. Sipas saj 12 qarqe janë shumë dhe vendi duhet të organizohet në rajone, por një ndryshim i tillë prek drejtpërdrejt sistemin zgjedhor.
“Do mundohemi që edhe 11 qarqeve të tjera tu japim numër bashkish sa më efektive dhe sa më në shërbim të qytetarëve. Midis 80 dhe 90. Ne në materialin tonë do të propozojmë që Shqipëria duhet ndarë në rajone dhe më pas është puna e komisionit të reformës zgjedhore numri, sepse ka të bëjë edhe më reformën zgjedhore”, tha Çupi ne nje interviste per Vizion Plus.
