Një ditë pasi Mirela Kumbaro u rikonfirmua si Ministre e Kulturës edhe në kabinetin qeveritar “Rama 2”, u mendua se Artemis Dralo do të merrte mandatin e deputetit, duke iu referuar praktikës së para 4 viteve. Por ndryshe nga sa ndodhi në vitin 2013, në mandatin e dytë qeverisës, kryeministri Edi Rama nuk do t’i kërkojë ministrave të rinj të mos mbajnë mandatin e deputetëve. Burimet nga selia roze thonë për ‘News 24’ se një procedurë e tillë nuk është në parashikimet e kryeministrit Rama.
Kjo shuan shpresat e Artemis Dralos në qarkun Gjirokastër, por edhe të disa emrave të njohur socialistë, që mbetën poshtë ‘vijës së kuqe’ në zgjedhjet e 25 qershorit. Mirela Kumbaro do të vazhdojë kështu detyrën e Ministrit të Kulturës, duke mbajtur gjithashtu edhe mandatin e deputetit të qarkut Gjirokastër. Pas rikonfirmimit të saj si ministre, në rrjetet sociale flitej se mandatin e Kumbaros do ta merrte Dralo.
‘Tani Dropulli do të ketë zërin e vet në Parlament. Artemisa Dralo për Dropullin që duam”, shkruhet në faqen FRESSH Dropull-Pogon.
Por ndërkohë vetë Artemis Dralo nuk ka bërë asnjë reagim në faqen e saj në Facebook, të paktën deri më tani, në dallim nga kolegu Flamur Golemi, i cili pak pas zyrtarizimit të kabinetit të ri, shprehu urime publike për Ministrat dhe në veçanti për Mirela Kumbaron.
A mos ndoshta kemi të bëjmë me ndonjë ‘qejfmbetje’ të Dralos karshi lidershipit të PS-së? Zëra pranë saj thonë se ajo kishte marrë një lloj konfirmimi deri në kufijtë e garancisë nga kryeministri Rama për të qenë pjesë e kabinetit qeveritar, ndoshta duke drejtuar Ministrinë e Diasporës, të cilën kreu i qeverisë ia besoi Pandeli Majkos.
Ndërkohë më herët asaj i është propozuar posti i Prefektit të Gjirokastrës. Por deri më tani, kështu siç rrodhën gjërat, gjasat janë që kandidatja për deputete e PS-së në Dropull, të emërohet në krye të ndonjë dikasteri tjetër ose në post zv.Ministri.
Çështja e kalimit të mandatit të deputetit prej Mirela Kumbaros ngjan një kapitull i mbyllur. Procedura e lëshimit të mandatit 4 vite më parë u përdor për të futur në listë emra socialistësh, që nuk kapën dot pragun e votave, kur në mes ishte edhe LSI. Por këtë radhe, gjërat janë ndryshe. Rama e ka vetë timonin, dhe në qeveri e parlament, mesa duket ka njerëzit që i duhen, çka e bën të panevojshëm zëvendësimin e tyre në Kuvend.
/ArgjiroLajm.net/
