Nga Thanas Verdhi
Shihni në sfond një pamje të pjesëshme dhe të rrallë të Gjirokastrës, kryesisht zonën e Kalasë dhe ” rrethinat” poshtë saj. Pamja është fotografuar pak javë më parë nga Kompleksi Turistik i Kërcullës, një pikë dominante, ku qyteti shfaqet me tërë madhështinë e vet. Prej aty Gjirokastra duket e magjishme, ” e heshtur dhe e rëndë”, ashtu siç është në të vërtetë dhe siç jam mësuar ta shoh unë përjetësisht atë.
Ngado që ta shohësh, Gjirokastra të habit me diversitetin e çuditshëm natyror dhe arkitekturën e veçantë. Është një qytet i vjetër dhe i ri njëkohësisht, ku, shtëpitë e mëdha tip fortesë janë ndërtuar në zona me reliefe tepër ” të thyera”, ku duket qartë se projektuesit dhe mjeshtrat e talentuar të ndërtimit kanë sfiduar e thyer të gjitha ligjet inxhenierike duke formësuar një qytet të rrallë dhe relativisht të madh për kohën, qytet që s’e gjen një tjetër të ngjashëm në tërë botën.
Është për të ardhur keq që gjirokastritët, veçanërisht ata që banojnë në pjesën e sipërme, largohen për t’u vendosur në qytete të tjera. Gjirokastra është një mrekuli që ” duhet lënë” vetëm për arsye madhore.
