Ministri i Brendshëm Taulant Balla ditën e sotme zhvilloi një takim me strukturat drejtuese të Drejtorisë Vendore të Policisë në Vlorë.
Gjatë këtij takimi Balla tha se qytetarët janë jo vetëm arsyeja se pse ekziston Policia e Shtetit, por edhe partnerët e pazvendësueshëm në mbrojtjen e vendit dhe të çdo individi, nga çdo lloj paligjshmërie, teksa kërkoi reagim të menjëhershëm.
Ministri më tej u shpreh se veshi i shurdhër dhe syri qorr, heshtja bashkëfajtore ndaj të fortëve të lagjes dhe mosreagimi i forcave të rendit ndaj denoncimeve të qytetarëve janë rreshtim i policisë kundër tyre, kundër shtetit, prandaj u kërkoi atyre reagim të menjëhershëm.
“Qytetarët janë jo vetëm arsyeja pse ekziston Policia e Shtetit, po janë edhe partnerët tanë të pazëvendësueshëm në mbrojtjen e vendit dhe të çdo individi, nga çdo lloj paligjshmërie, që nga krimi i organizuar, tek krimi ordiner dhe deri tek krimi ndaj pronës publike dhe asaj private.
Veshi i shurdhër dhe syri qorr, heshtja bashkëfajtore ndaj të fortëve të lagjes dhe mosreagimi i forcave të rendit ndaj denoncimeve të qytetarëve janë rreshtim i policisë kundër tyre, kundër shtetit. Ndaj dua nga ju reagim të menjëhershëm”, tha Balla, ku ndër të tjera u kërkoi atyre që përgjatë këtij sezoni turistik të garantojë një vijë bregdetare të sigurt për pushuesit nga mjetet lundruese.
