Leonard Beleri, vëllai i kryebashkiakut të zgjedhur të Himarës, ka dhënë një intervistë për mediat greke, teksa Fredi Beleri ndodhet në paraburgim pasi akuzohet për blerje votash.
Ai pretendon se qeveria e kryeministrit Rama nuk mund të lejojë të humbasë Himarën, pasi mund t’i dalin në dritë falsifikimet.
“Qeveria dhe zoti Rama personalisht nuk duan të humbin bashkinë e Himarës. Sepse do të dalin shumë. Vazhdojnë të bëjnë falsifikime me parcelat. Festa vazhdon”, tha Leonardo Beleris për ERT.
Beleri ka folur dhe për qëndrimin e Gergi Goros në detyrën e tij, i cili edhe pse u raportua se do të largohej, ai mohoi se ka dhënë dorëheqjen.
“Zoti Goro nuk merr dot frymë nëse nuk merr leje nga zoti Rama”, tha ai, duke përsëritur sugjerimin e të vëllait që nëse nuk është vetë kryetar bashkie që është zgjedhur, atëherë dikush të marrë postin, një i zgjedhur tjetër nga fraksioni i tij.
“Fatkeqësisht kemi një bashkëbisedues jo të besueshëm”, tha vëllai i kryebashkiakut të zgjedhur Fredi Beleri, duke thënë se Goro do të qëndrojë në detyrën e tij për aq kohë sa të dojë zoti Rama.
Ai tha se kryeministri i Shqipërisë preferon të sakrifikojë të ardhmen e popullit të tij dhe që Shqipëria të mos hyjë në BE, sesa të humbasë bashkinë e Himarës.
Madje ai vlerësoi se veprimet e tij janë për faktin se falsifikimet janë bërë në nivelin më të lartë dhe sipas tij fatkeqësisht shumë njerëz duhet të mbrohen nën ombrellën e Ramës.
