Nënkryetari i Partisë Demokratike Roland Bejko, përmes një deklarate për mediet tha se në rruga Kardhiq-Delvinë edhe pse janë kryer investime marramendëse, sërish nuk ka përfunduar duke rrezikuar jetën e shqiptarëve.
Sipas Bejkos, rruga nuk ka asnjë element sigurie.
“Rruga Kardhiq-Delvinë, e gjatë 33 km, ndonëse ka kushtuar plot 154 milionë euro, vijon të jetë e papërfunduar dhe pa standardet që do duhet të kishte. Edhe pse kostot e kësaj rruge, kanë kapur shifra marramendëse për një rrugë interurbane të kategorisë C2, duke e rritur shumën fillestare nga 60 në 130 e më pas në 154 milion euro, kjo rrugë nuk ka asnjë element sigurie”, tha Bejko.
“Mungesa e bordurave mbrojtëse prej betoni, si dhe e sinjalistikës rrugore, veçanërisht në segmentin në daljen nga tuneli i Skërficës, janë burim i përhershëm aksidentesh, ashtu siç ndodhi dy ditë më parë, fatkeqësisht me pasoja fatale për jetën e shoferit ukrainas. Me të njëjtën situatë përballen qytetarët që u duhet të përshkruajnë Rrugën e Arbrit, atë Korçë -Ersekë, të cilat, po ashtu, në të gjithë gjatësinë e tyre janë të papërfunduara dhe shpeshherë bëhen shkak për aksidente me pasoja të rënda”, vijon Bejko.
“Partia Demokratike e Shqipërisë zotohet se nesër në pushtet do t’i kalojë në lupën e një kontrolli të rreptë të gjithë investimet infrastrukturore të kësaj qeverie, për të parë dhe për të evidentuar të gjitha shkeljet dhe abuzimet që janë bërë në dëm të këtyre projekteve”, përfundoi Bejko.
