“Infrastruktura hekurodhore në Shqipëri po modernizohet dhe brenda 10 vitesh, do të kemi një rrjet të rivitalizuar’’. Kështu ka thënë për SCAN TV eksperti i hekurudhave njëherazi administrator i rrjetit të transportit hekurudhor Fier-Ballsh dhe Fier-Vlorë, Dritan Spahiu. Elektrifikimi i rrjetit mbetet një sfidë për transportin hekurudhor, ku lidhja me tregun rajonal sipas Spahiut do të sjellë zhvillim të madh ekonomik.
“Elektrifikimi i rrjetit është sfidë. Kjo do të bëjë të mundur përfitimin në mjedis, por dhe lidhjen me rrjetin rajonal e më gjerë. Me modernizmin e hekurudhave, për 5-10 vite do të kemi një sektor tërsisht të rivitalizuar. Kryesisht distancat e lëvizjes janë të shkurtra në Shqipëri, por çfarëdo kosto që të ketë në fillim, sepse dihet se janë shumë të larta, por mos harrojmë se përfitimet në të ardhmen do të jenë shumë më të mëdha. E vetmja linjë që bën transport mallarash në vend, është Fier -Vlorë me mbi 500 mijë ton/në vit’’- ka thënë Spahiu.
Spahiu ka vlerësuar projektet, Vorë-Hani Hotit dhe Durrës-Prishtinë duke i cilësuar si investime të jashtëzakonshme.
“Trasporti hekurudhor sfidon transportin rrugor, pra po bëhen investime të jashtëzakonshme. Për rikonstruksionin e linjës Vorë -Hani Hotit, do shpenzohen 370 mln euro për 120 km, për Durrës -Tiranë fondi 80 mln euro. Transporti i mallrave është shumë i rëndësishëm, sepse të lidh me tregun ndërkombëtar hekurudhor, përfitojmë dhe nga tranziti. Vendi jo vetëm lidhet me Malin e Zi, por do lidhemi dhe me Kosovën, si dhe me Maqedoninë e Veriut.
Këto tre lidhje do plotësojnë interaktivitetin e rrjetit tonë me atë ndërkombëtar. Po vlerësojmë edhe lidhjen me Greqinë, por jemi në hapa shumë fillestar për të parë se sa leverdi ka. Ndërkohë, janë avancuar negociatat për lidhjen me Maqedoninë e Veriut. Deri në Pogradec është linja ekzituese, por ka nevojë për rehabilitime të thella”- shton Spahiu.
Sa i takon rrjetit hekurudhor në jug të vendit, Spahiu thotë se është bërë një investim mbi 10 mln euro për rehabilitimin e linjës Fier -Vlorë, por duhet të bëhet dhe lidhja Fier-Durrës për të patur ndërveprim.
