Motrat artiste të verbra Blerina dhe Alda Shalari emocionuan artdashësit në qytetin e Gjirokastrës me interpretimin e tyre në koncertin muziko-teatral të titulluar “Rrënjët”.
Aktiviteti u mundësua nga Shoqata e të Verbërve në Gjirokastër me mbështetjen e bashkisë, duke sjellë në skenë e teatrit “Zihni Sako” një koncert të veçantë.
Atmosferës mbresëlënëse që krijoi ky aktivitet iu bashkua edhe interpretimin i aktorit të mirënjohur të Teatrit Kombëtar, Dritan Boriçi.
Artistët vlerësuan mikpritjen e ngrohtë, duartrokitjet që morën nga spektatorët e pranishëm ndërsa premtuan se do të rikthehen sërish në skenën artistike të qytetit të gurtë.
“Jemi midis njerëzve të qytetit, të origjinës sonë midis artdashësve gjirokastritë, është kënaqësi të vish në Gjirokastër unë kam ardhur edhe herë tjetër, por jo si këtë herë dhe jam shumë e lumtur që mundëm të jepnim këtë mesazh arti në qytetin tonë”, tha Blerina Shalari, artiste.
“Shumëfishohen emocionet kur vjen në qytetin e origjinës dhe kur vijmë në një mënyrë mendoj mjaft ndryshe, me një temë mjaft ndryshe, me një koncert muziko-teatral dhe kjo besoj që është diçka interesante edhe për ata që kanë pasur mundësinë që të na ndjekin, edhe pse është një shfaqje komplekse”, shprehet Alda Shalari, artiste.
Prej fillimit të vitit në Gjirokastër janë zhvilluar aktivitete të shumta kulturore me pjesëmarrjen e artistëve vendas dhe të huaj. Kalendari i larmishëm i aktiviteteve kulturore dhe artistike vlerësohet si një mundësi e mirë për gjallërimin e qytetit por edhe në shërbim të zhvillimit të turizmit.
