Drejtuesi i emisionit “Opinion”, gazetari Blendi Fevziu paralajmëroi se nga dita e enjte në vendi tonë pritet të ndodhin “dallgë” të mëdha.
Në emisionin që trajtoi çështjen e Habiljave dhe lidhjes së pretenduar me ish-ministrin e Brendshëm Saimir Tahiri, gazetari u shpreh se kjo dosje ka qenë prezente në Shqipëri.
“Nga e enjtja parashikohen dallgë të mëdha. Sot janë hedhur edhe teza te luftës së brendshme në Partinë Socialiste. Çdo gjë është e mundur. Por një gjë është e sigurt: kjo dosje ka qenë prezente në Shqipëri” tha Fevziu.
Moisi Habilaj u arrestua dy ditë më parë në Itali i konsideruar nga autoritetet atje si kreu i bandës së trafikut ndërkombëtar të drogës nga Shqipëria në shtetin fqinj.
Nga përgjimet që janë kryer ndër vite në Itali, Habilaj përmend në biseda me anëtarë të tjerë të grupit edhe ish-ministrin Tahiri ku thotë se i detyrohet shuma të konsiderueshme parash për mbështjetjen që ka gëzuar prej tij.
Ndërkohë dje deputeti socialist Saimir Tahiri e vetëdeklaroi veten të pafajshëm duke kërkuar që hetimet t’i shkojnë deri në fund kësaj çështjeje për të zbuluar të vërtetën.
