Gjykata e Athinës ka liruar 27-vjeçarin me origjinë nga Palestina i cili akuzohet se ka mbajtur peng ka dhunuar një 33-vjeçare shqiptare dhe e ka plagosur këtë të fundit me thikë. Sic shkruajnë mediat greke, 27-vjeçari Mohammad Odi është lënë i lirë pasi e reja shqiptare Gabriela Çelaj nuk ka dhënë një deklaratë zyrtare për shkak se ndodhet e shtruar në spital.
Mësohet se Odi është lënë i lirë me kushte kufizuese që të mos largohej nga vendi dhe të paraqitej në komisariat. Ky vendim u mor pasi policia nuk mundi të merrte deklaratë nga vajza, e cila nuk ishte në gjendje të dëshmonte, pasi siç thanë mjekët është rrahur shumë keq. Normalisht do duhej që dhunuesi të mbahej në burg derisa vajza të jepte dëshminë e saj.
Lidhur me ngjarjen e rëndë ka folur sot edhe nëna e 33-vjeçares e cila ka treguar se vajza e saj u gjet në një bodrum, e lidhur dhe e dhunuar keq, me plagë në sy dhe kokë. Ngjarja e rëndë ndodhi në rrugën “Ksouthou” në Athinë në një objekt të braktisur, ku efektivët pasi kanë dëgjuar disa thirrje për ndihmë kanë shkuar në katin e parë të objektit dhe kanë parë një derë të mbyllur me dryn. Efektivët kanë hapur derën, kanë nxjerrë shqiptaren që aty dhe e kanë dërguar në spital, ku po vijon të marrë aktualisht mjekim. Sakaq nuk dihen ende arsyet përse i riu nga Palestina e mbante mbyllur vajzën 33-vjeçare, apo arsyet që e kanë çuar atë drejt dhunës barbare.
