Mjeku Edmond Gashi është paraqitur këtë të enjte në Prokurorinë e Posaçme, për të dëshmuar për skandalin e zbuluar javë më parë në Spitalin Onkologjik, ku pacientët me kancer udhëzoheshin të shkonin në klinika private, dhe jo në shtet.
I pyetur nga agjentët e Byrosë Kombëtare të Hetimit, ai është shprehur se nuk ka marrë pjesë në asnjë skemë korruptive, madje ka pretenduar se ka hapur klinikën e tij private duke u përfshirë në dypunësim vetëm që të mos merrte para nën dorë.
“Ndaj u angazhova në dypunësim edhe në shtet edhe në klinikë, për të mos u përfshirë në mitmarrje”, mësohet të ketë thënë Gashi. Më pas, ai ka pretenduar se më shumë ndërhyrje kirurgjikale i ka kryer në spitalin e shtetit dhe një pjesë të vogël i ka bërë në klinikën e tij private.
Gjatë dëshmisë së tij, siç ka mësuar gazetarja Anila Hoxha, mjeku onkolog Edmond Gashi ka pohuar se shumë pacientë kanë kërkuar me vullnet të lirë që të ndiqeshin në klinikën private të tij dhe jo në spitalin shtetëror.
SPAK po heton dhe rolin e drejtoreshës së spitalit të Onkologjikut nëse ajo ka kryer siç duhet punën e saj gjatë kohës që mjekët janë akuzuar për afera korruptive dhe nëse ajo ka denoncuar në ndonjë moment rastet.
Skandali me Spitalin Onkologjik u bë publik në qershor të këtij viti kur Prokuroria e Tiranës zbërtheu skemën kriminale se si mjekët dhe stafi i Spitalit Onkologjik bënin pazare dhe orientonin drejt privatit pacientët e diagnostikuar me kancer.
Këta shtetas, duke qenë të punësuar pranë Spitalit Onkologjik në QSUT, nuk jepnin shërbimin e duhur në spitalin shtetëror por i orientonin pacientët në klinika private, me çmime shumë të shtrenjta dhe që rëndonin direkt në xhepat e pacientëve në luftë për jetën.
