Agim Sallaku, një ndër pilotët më profesionist të Forcës Ajrore të Ushtrisë Shqiptare, ka mbyllur sytë përgjithmonë pasditen e 16 Gushtit. Nënkoloneli që me helikopterin e FA ka marrë pjesë në qindra operacione evakuuimi, kërkim-shpëtimi dhe emergjencash natyrore, ndërroi jetë nga sëmundja e rëndë.
Bashkëshortja e tij e ka kujtuar sot, pas gati dy muajsh nga ikja e parakohshme dhe e padrejtë, duke i dedikuar një mesazh të ndjerë. “Zemërthyer dhe e mbytur në trishtim, largimi yt më ka lënë pa fjalë”, shkruan Florinka Alla, duke kujtuar rrugëtimin e nënkolonelin 20 vite më parë.
“Por sot kujtimet më çuan 20 vite më parë, kur në një ditë si sot do të takoheshim për të nisur një rrugëtim së bashku. U rritëm së bashku dhe shpresonim që të plakeshim së bashku, por shumë shpejt më le vetëm në këtë rrugëtim. Shumë e padrejtë dhe e pabesueshme.
Ishe shoku im më i mirë, mbështetja ime më e madhe dhe njeriu më i rëndësishëm në jetën time. Pusho me engjëjt njeriu me zemrën më të mirë dhe më të madhe që ekzistonte në këtë Botë të mbushur plot padrejtësi”, shkruan ajo.
Agim Sallaku ishte profesionist i Forcave të Armatosura, një ndër pilotët më të mirë të ushtrisë shqiptare, bashkëshort i dashur, baba i dy fëmijëve të mrekullueshëm dhe një qytetar model që i mungon sot Republikës.
“Shpresoj të takohemi sërish një ditë, por deri atëherë më ngelet si detyrë të të bëjmë krenar dhe të lartësojmë madhështinë e njeriut që ishe dhe emrit që le pas. Je mendimi i fundit që kam në mendje kur bie të fle dhe mendimi i parë kur zgjohem në mëngjes. I përjetshëm në zemrën dhe kujtimet e mia Agim djali! Më mungon pafund”, përmbyll mesazhin bashkëshortja e tij, Florinka Alla.
