UEFA ka dënuar Kosovën me humbje në tavolinë të ndeshjes ndaj Rumanisë, me rezultatin 3-0. Shkak për këtë, është bërë braktisja e ndeshjes nga lojtarët “dardanë”, pak sekonda para fundit.
Futbollistët e Kosovës, u larguan nga fusha e lojës, për shkak të thirrjeve anti-shqiptare nga tifozët rumunë. Pavarësisht se gjyqtari kërkoi rikthimin e skuadrave në fushë, lojtarët e Kosovës refuzuan.
Në vendimin e kësaj të mërkure, UEFA ka vendosur t’i japë fitoren në tavolinë Rumanisë, ndërsa ka dënuar Federatën e Kosovës me një gjobë prej 6 mijë eurosh, për sjellje të gabuar të lojtarëve.
Ndër të tjera, me gjobë është dënuar edhe Federata Rumune, e cila urdhërohet të luajë një ndeshje pa tifozë.
VENDIMI I UEFA
Organi i Apelimit i UEFA-s ka marrë vendimet e mëposhtme:
Ndeshja: Rumania kundër Kosovës (0:0), 15.11.2024, UEFA Nations League 2025
Akuzat kundër Federatës Rumune të Futbollit:
Sjellja raciste/diskriminuese, Neni 14(2) i Rregullores Disiplinore të UEFA-s
Bllokimi i rrugëve publike, Neni 38 SSR
Hedhja e sendeve, Neni 16(2)(b)
Ndezja e fishekzjarrëve, Neni 16(2) (c)
Përdorimi i treguesit lazer, Neni 16(2)(d)
Trazirat gjatë himneve kombëtare, Neni 16(2) (g)
Transmetimi i mesazhit që nuk është i përshtatshëm për një ngjarje sportive (thirrje të paligjshme), Neni 16(2)(e)
Sjellja e pahijshme e ekipit (kartonë të verdhë për 5 lojtarë ose më shumë), Neni 15(4)
Vendimi:
Apeli ka vendosur:
Të gjobisë Federatën Rumune të Futbollit me 50,000 euro dhe të urdhërojë mbylljen e stadiumit të Federatës Rumune të Futbollit gjatë (1) ndeshje të ardhshme në të cilën Federata Rumune e Futbollit do të luajë si shoqatë pritëse, për sjelljen raciste dhe/ose diskriminuese të mbështetësve të saj (në lidhje me thirrjet ksenofobike antihungareze).
Të gjobisë Federatën Rumune të Futbollit me 30,000 euro për transmetimin e mesazheve provokuese politike të papërshtatshme për një ngjarje sportive.
Të gjobisë Federatën Rumune të Futbollit me 9000 euro për hedhjen e sendeve.
Të gjobisë Federatën Rumune të Futbollit me 4500 euro për ndezjen e fishekzjarrëve.
Të gjobisë Federatën Rumune të Futbollit me 8000 euro për përdorimin e treguesit lazer.
Të gjobisë Federatën Rumune të Futbollit me 12500 euro për shkak të trazirës gjatë himnit kombëtar.
Të gjobisë Federatën Rumune të Futbollit me 14 mijë euro për bllokimin e rrugëve publike.
Të paralajmërojë Federatën Rumune të Futbollit për sjelljen e pahijshme të ekipit të saj.
Akuzat ndaj Federatës së Futbollit të Kosovës:
Refuzimi për të luajtur (heqja dorë), Neni 27(1) dhe Neni 27(4)(a) në lidhje me Nenin 25.01 Rregulloret e UEFA Nations League
Sjellja e pahijshme e ekipit (kartonë të verdhë 5 lojtarë ose më shumë), Neni. 15(4)
Vendimi:
Apeli ka vendosur:
Të shpallë ndeshjen e UEFA Nations League 2025 ndërmjet ekipeve përfaqësuese të Federatës Rumune të Futbollit dhe Federatës së Futbollit të Kosovës, e luajtur më 15 nëntor 2024, si e braktisur nga Federata e Futbollit të Kosovës (e cila për këtë arsye konsiderohet se e ka humbur ndeshjen 3-0) për përgjegjësinë që ndeshja nuk luhet plotësisht (siç parashikohet në nenin 25.01 Rregulloret e UEFA Nations League).
Të gjobisë Federatën e Futbollit të Kosovës me 6000 euro për sjellje të pahijshme të skuadrës së saj.
