Kryeministri Edi Rama gjatë një takimi me prindërit dhe mësuesit në shkollën “Halit Coka”, në Kamëz, në kuadër të diskutimit për kufizimin e “TikTok”-ut nënvizoi se rrjetet sociale kanë të njëjtin efekt si drogat dhe krijojnë të njëjtën varësi.
Sipas Ramës, bllokimi i tyre do të ishte një ndihmë, por duhet gjetur një zgjidhje për këtë fenomen shqetësues në shumë vende të tjera të botës.
“Jeta virtuale ka efekt deri në shëndetin mendor të fëmijëve. Botën virutale përpiqen ta sjellin në botën reale, duke krijuar edhe akte të rënda kriminale. Sikur, faktikisht zgjat aventurën e ekranit në jetën reale ku arrin deri edhe të vrasësh, e të mos kuptosh se çfarë ke bërë.
Bllokimi i ‘TikTok’-ut është ndihmë, por jo zgjidhje. Duhet përfshirje e drejtpërdrejtë e familjes, shkollës, dhe të dyja pastaj bashkë, prindër, mësuesit, dhe institucioneve të tjera.
Këto rrjete janë të shndërruara si gropa thithëse në bazë të gjërave që çdokush klikon dhe shikon aty, kanë të njëjtin efekt siç kanë drogat i bëjnë të varur nga ekrani, u japin më shumë ushqim”, tha Rama.
