FIFA ka zyrtarizuar që Kampionati Botëror 2034 do të zhvillohet në Arabinë Saudite. Për herë të parë në histori, ky vend i Lindjes së Mesme do të jetë mikpritës i turneut më të rëndësishëm të futbollit, dhe nuk kishte asnjë kandidat tjetër që të rivalizonte gjatë paraqitjes së ofertave. Zgjedhja nuk ishte e komplikuar, pasi Arabia Saudite ishte e vetmja që garonte për organizimin e turneut që do të zhvillohet pas më pak se dhjetë vitesh.
Ky është një hap tjetër vendimtar për federatën saudite, e cila synon të luajë një rol të rëndësishëm në futbollin botëror. Pas përforcimit të kampionatit kombëtar me transferime të jashtëzakonshme dhe ardhjen e lojtarëve të mëdhenj nga skuadrat më të mira të Evropës, futbolli saudit po përgatitet për kurorëzimin e tij që do të ndodhë pikërisht me Kupën e Botës. Ashtu si në Katar, ka shumë mundësi që turneu të luhet në dimër.
Gjithashtu, FIFA ka zyrtarizuar vendet pritëse për Kampionatin Botëror 2030, të cilat janë Argjentina, Paraguai, Uruguai, Maroku, Portugalia dhe Spanja.
Për shkak të rrotacionit kontinental, organizimi i Kampionatit Botëror duhej të bëhej nga një vend i konfederatave aziatike ose oqeanike. Në këtë kontekst, asnjë shtet tjetër nuk mund të mbante hapin me Arabinë Saudite. Indonezia dhe Australia tërhoqën shpejt kandidaturat e tyre, duke lënë Arabinë Saudite si të vetmen kandidate, e cila ka infrastrukturë të përshtatshme për të pritur një turne të tillë madhor. Gjatë viteve të fundit, ky vend ka marrë një pjesë të rëndësishme të organizimit të sporteve të ndryshme, nga gara automobilistike deri te tenisi, dhe futbolli është kulmi i këtij projekti.
Dosja e paraqitur nga Arabia Saudite përfshin 15 stadiume futuristike ultramoderne, të shpërndara në qytetet kryesore të vendit. Ashtu si në Katar, edhe këtu Kampionati Botëror do të luhet në dimër ose në vjeshtë të vonë.
Vera saudite është tepër e nxehtë, ndaj do të jetë e nevojshme që kampionatet kombëtare të ndërpriten në mes të sezonit, ndonëse gjithçka duhet të balancohet me fillimin e Ramazanit, i cili në vitin 2034 nis më 11 nëntor.
