Trupi i pajetë i Kryepeshkopit të Shqipërisë Anastas mbërrin sot në Tiranë.
Arkëmorti u nis dje nga Katedralja e Athinës, dhe hyri në territorin shqiptar përmes pikës së kalimit kufitar të Kakavijës rreth orës 8.30. Arkëmorti me trupin e pajetë të Kryepeshkopit Anastas u prit nga qindra besimtarë ortodoksë me lule në duar dhe kurora me dafina.
Gjatë rrugës kortezhi me arkëmortin e Anastas bëri ndalesa në zonat ku ai shërbeu dhe punoi për rindërtimin e Kishës Autoqefale shqiptare.
Besimtarët e shoqëruan kortezhin drejt Katedrales Ortodokse “Ngjallja e Krishtit” në Gjirokastër, ku klerikët ortodoksë mbajtën meshë për nder të Kryepeshkopit Anastas. Për më shumë se një orë qytetarë të shumtë të Gjirokastrës dhe të zonave përreth kryen homazhe dhe lutje për shpirtin e kryepeshkopit në katedralen e gjirokastrës.
Shoqërues të kortezhit janë 4 klerikë shqiptarë, mitropoliti i Apolonisë dhe Fierit, Nikolla, peshkopi i Krujës Anastas dhe priftërinjtë Harallamb Gjoka e Spirodhon Topanxha, bashkëpunëtorë të ngushtë të tij në ringritjen gjalljen e Kishës Ortodokse Autoqefale të Shqipërisë. Përfaqësues I Kishës së Greqisë, do të jetë nënkryetari i Sinodit të Shenjtë, Mitropoliti i Nafpaktos dhe Shën Vlashit Vlasios Jerotheos.
Në Tiranë trupi i pajetë pritet të mbërrijë sot rreth orës 16:00, ku do të zhvillohen homazhe për dy ditë ndërsa të enjten në orën 11:00 do të kryhet ceremonia mortore për Hirësinë e tij Anastas.
Mediat greke shkruajnë se Kryeministri Kyriakos Mitsotakis do të jetë në Tiranë të enjten për të marrë pjesë në funeralin për Kryepeshkopin e ndjerë Anastas Janullatos.
Kujtojmë se pas vdekjes së Kryepeshkopit Anastas Janullatos, Kisha Ortodokse Autoqefale e Shqipërisë shpalli zi kishtare për pesë ditë, nga 25 Janari deri më 29 Janar.
