Ngjarja tragjike e vetëvrasjes së 17-vjeçares, Irsa Muçollari, në Gjirokastër ka tronditur qytetetin dhe jo vetëm. Bullizmi i vazhdueshëm nga shoqëria e saj në shkollë, dyshohet të jetë shkaku kryesor i këtij vendimi ekstrem.
Bashkia e Gjirokastrës, gjatë një mbledhjeje ditën e djeshme, ka vendosur që t’i japë familjes së saj një ndihmë financiare prej 3 milionë lekësh të vjetra. Mësohet se gjatës mbledhjes vendimi u votua unanimisht nga anëtarët e këshillit bashkiak, të cilët mbajtën edhe 1 minut heshtje në shenjë respekti për jetën e humbur të 17-vjeçares. Ky vendim u mor në solidaritet me familjen e saj dhe në njohje të situatës së vështirë që po kalojnë.
Ndërkohë, autoritetet po vazhdojnë hetimet për të zbardhur shkaqet që mund ta kenë çuar adoleshenten drejt aktit tragjik, ndërsa ngjarja ka ngritur shqetësime të reja mbi nevojën për mbështetje më të madhe psikologjike për të rinjtë në shkolla.
Lidhur me hetimet, bëhet me dije se janë marrë në pyetje nga oficerët e Policisë gjyqësore mbi 100 persona. Pjesë e marrjes në pyetje kanë qenë stafi pedagogjik, drejtues të institucionit e zyrës arsimore si edhe nxënës të gjimnazit Siri Shapllo, aty ku dhe adoleshentja studionte.
