Të dhëna statistikore për shtimin e rasteve me sëmundjen e diabetit, të bëra publike nga autoritetet e Spitalit rajonal, ‘Omer Nishani’ në Gjirokastër, në kuadër të Ditës Botërore të Diabetit, flasin për shifra të frikshme.
Sipas statistkave zyrtare numri i të diagnostikuarve me diabet të tipit 1 në Qarkun e Gjirokastrës ka shënuar rritje deri në afro 80 raste të reja.
Mjekët pohojnë se në urgjencën e këtij spitali shënohen 3 raste në ditë të diagnostikimit të të sëmurëve me diabet.
Pothuajse në të gjitha rastet, personat e diagnostikuar nuk kanë qenë në dijeni se janë mbartës të kësaj sëmundjeje.
Numri i diabetikëve në Gjirokastër arrin në mbi 700. Ndërkohë që, vihet re një tendencë në rritje dhe ulje e moshës së prekur nga kjo sëmundje.
Krahasuar me 20 vite më parë, numri i diabetikëve në këtë qark është shtuar, duke përfshirë këtu fëmijët dhe të rinjtë.
Por, nuk përjashtohen edhe moshat e vogla deri në 13 vjeç, edhe pse në shifra të ulëta.
Sipas mjekëve, të rinjtë janë më të prekur nga diabeti i tipit 1.
Ndërsa, më i përhapur është diabeti i llojit 2, që zë edhe 90% të rasteve.
Të vegjlit e prekur nga diabeti janë kryesisht nga rrethi i Tepelenës dhe Përmetit.
