Nga Tërmet Peçi
Të nderuar motra, vëllezër, kolegë, këshilltarë, kryepleq, qytetarë, bashkëudhëtarë të mi! Më lejoni që përmes këtij komunikimi të sinqertë dhe të përzemërt t’ju shpreh mirënjohjen time më të thellë.
Në këtë rrugëtim të gjatë të jetës dhe karrierës sime, ju keni qenë mbështetja, frymëzimi, pasioni dhe ëndrra ime për të drejtuar për 14 vite me radhë Bashkinë e Tepelenës, si qytetari i parë dhe shërbëtori juaj. Ju, me këshillat, kritikat, besimin, dyshimet, kurajon, e madje edhe me refuzimin tuaj, më ndihmuat të rritem dhe më bëtë të jem ky që jam sot, ballë jush!
Jam krenar që bashkë përcaktuam fatin e Tepelenës, Kurveleshit, Lopësit dhe Qendrës, duke u bërë gur themeli i një historie suksesi! Sot, po lë në mes rrugën që nisëm bashkë, jo sepse heq dorë nga misioni ynë, por sepse jam thirrur për një detyrë edhe më të madhe dhe më sfiduese. Besomëni, ëndrra jonë për ta bërë Tepelenën perlën e çmuar të jugut dhe të gjithë Shqipërisë do të vazhdojë!
Kam dorëzuar dorëheqjen time si Kryetar i Bashkisë Tepelenë dhe njëkohësisht i jam përgjigjur ftesës së Kryeministrit, z. Edi Rama, për të qenë pjesë e garës më #11Maj, e për të përfaqësuar Tepelenën dhe gjithë qarkun Gjirokastër në Kuvendin e Shqipërisë.
Ky është një privilegj i madh për mua, por mbi të gjitha një përgjegjësi e madhe ndaj jush, tepelenasve kudo ku ndodheni, që keni parë shpresën tek ne – tek unë, tek Kryeministri dhe tek Partia Socialiste. Mirënjohje përulësisht për mbështetjen tuaj! Jam i bindur se do të jemi sërish bashkë për një betejë edhe më të madhe dhe më të bukur! Për ta çuar Tepelenën, Qarkun Gjirokastër dhe Shqipërinë më shpejt në familjen e madhe evropiane.
