Një situatë e rëndë mjedisore është krijuar në rezervuarin e fshatit Kasharaj në Lushnje, ku tharja e plotë e ujëmbledhësit ka lënë tonelata peshqish në baltë. Peshqit kanë ngordhur dhe kanë nisur të dekompozohen, duke krijuar një situatë shqetësuese për mjedisin dhe banorët e zonës.
Shkak i situatës është bërë ndërhyrja për rehabilitimin e shkarkuesit të rezervuarit, një investim që, sipas banorëve, ka mbetur përgjysmë. Shkarkuesi kryesor i ujit kishte probleme me bllokimin, ndërsa për rehabilitimin e tij Bashkia Lushnje ka akorduar një fond prej 320 milionë lekësh.
Punimet duhej të kishin përfunduar rreth një vit më parë, por kompania që ka fituar tenderin ka kërkuar shtyrje të afatit të përfundimit.
