Kumbaro takim me lagjet Dunavat, Palorto e Varosh: Dunavati po zhvillohet si Qafa e Pazarit, Gjirokastra turistike është realitet
Në vijim të takimeve elektorale për zgjedhjet e 11 Majit, drejtuesja politike e qarkut Gjirokastër Mirela Kumbaro, e shoqëruar nga kandidatët Piro Dhima dhe Shyqyri Hysi, pati një bashkëbisedim me banorët e lagjeve Dunavat, Palorto e Varosh.
“Sot e kalova ditën në rrugët e Dunavatit ku arrita të shikoj duke ecur me këmbë, punët e bëra dhe dikush, kur u hap bypassi para dy vitesh më kujtoi që kisha thënë: Do bëhet Dunavati si pazari dhe do flasim për qafën e pazarit të Dunavatit. U bë! Në vitin 2013 këtu kishte dy hotele e gjysmë, ndërsa deri sot numri është rritur me dhjetërafish. Këtu secili nga ju ka një kontribut”, u shpreh Kumbaro.
Më tej, Kumbaro foli për projektet infrastrukturore të cilat siç u shpreh ajo, nuk janë vetëm rrugë, por akse zhvillimi që tërheqin vizitorët.
“Ka shumë projekte siç është Ura në Vjosë, ndërtimi i së cilës do të fillojë brenda vitit 2025, që fillon nga Ura e Aliut para se të futemi në Tepelenë dhe shkon deri në Dragot. Por jo vetëm kaq, ura e Viroit do të jetë një urë e dedikuar për makinat për të zgjeruar hapësirat për këmbësorët, e cila ka nisur. Të gjitha këto nuk janë thjesht rrugë për ne, vetëm për banorët. Janë akse zhvillimi për të shtuar numrin e turistëve. Jemi të gjithë bashkë, dropullitë e libohovitë, përmetarë e këlcyriotë, memaliotë e tepelenas. Do të jemi çdo ditë me ju, edhe më shumë”, tha Kumbaro.
