Policia e Gjirokastrës njoftoi sot për ndalimin e një gruaje nga Tirana me mall kontrabandë të futur nga pika kufitare e Kakavijës. Sipas njoftimit 42-vjeçarja B.P kishte pajisje elektro-shtëpiake të reja, për të cilat nuk dispononte asnjë dokument faturë blerje apo deklaratë doganore. Por ndërkohë burime të ArgjiroLajm.net nga pika doganore e Kakavijës, thonë se nuk kemi të bëjmë me mallra kontrabandë. Zonja në fjalë ishte një emigrante që kishte lënë Greqinë për t’u kthyer në Shqipëri dhe kishte marrë me vete pajisje elektro-shtëpiake të përdorura, për të cilat nuk mund të bëhej zhdoganim.
Vlerësimin e mallit e kanë bërë agjentët doganorë në Kakavijë, të cilët konstatuan se nuk ishin mallra që mund të paguhej taksa doganore. Por në postbllokun e policisë rrugore pranë fshatit Mashkullorë, 42-vjeçarja është ndaluar. Efektivët e rrugores, jo të krimit ekonomik e finananciar, ndonëse nuk janë ekspertë për vlerësimin e mallit, e sekuestruan atë dhe ndaj gruas nisi procedimi për veprën penale “Tregtim dhe transportim të mallrave që janë kontrabandë”, në Prokurorinë e Gjirokastrës. Pra, kemi të bëjmë me një rast të pastër abuzimi nga efektivët e Policisë Rrugore në Gjirokastër ose tejkalim apo ngatërrim kompetencash. Sidoqoftë përvoja ka treguar se çështje të tilla mbyllen nga Prokuroria pasi hetimet provojnë që nuk kemi të bëjmë me futje të mallrava kontrabandë. Megjjithatë mbetet për t’u parë së çfarë do të ndodhë me rastin kontret.
Mallrat për të cilat policia rrugore në Gjirokastër pretendon se janë futur kontrabandë janë këto: një mikrovalë, një hekur rrobash, një thekëse buke, një spricator për rroba, një pajisje lavamani, një sobë, dy kuti detergjenti, një lavapjatë, dy frigoriferë, një larëse rrobash dhe një tharëse rrobash. Sido që të përfundojë çështja, edhe në rastin kur Prokuroria mund t’i pushojë hetimet ndaj 42-vjeçares nga Tirana, rikthimi në atdhe pas shumë vitesh emigracion, me siguri që i është dukur një ferr i vërtetë, pasi do të sorollatet nëpër institucione për të zgjidhur procedimin penal që është nisur ndaj saj.
©ArgjiroLajm.net
