Ministrat, deputetët dhe krerët e degëve të Partisë Socialiste janë vënë në lëvizje për spastrimin e militantëve të Lëvizjes Socialiste për Integrim nga administrata. Kryeministri Edi Rama ka kërkuar që brenda muajit të mos ketë asnjë militant në institucione dhe për këtë arsye ka nisur mobilizimi i të gjitha strukturave për të larguar drejtorët dhe nëpunësit e thjeshtë të emëruar nga Ilir Meta. Prej disa ditësh në bazë kanë nisur mbledhjet mes ministrave dhe deputetëve, për të detajuar planet se si do të vijohet më tej me hapat dhe mënyrën e procedimit të shkarkimit të militantëve të LSI.
Por ajo që bie në sy ka të bëjë me faktin se në shumicën e qarqeve dhe qyteteve të ndryshëm të vendit, të gjithë drejtorët e emëruar nga Lëvizja Socialiste për Integrim jo vetëm që po rezistojnë dhe sfidojnë urdhrin e largimit, kërkuar nga qeveria, por e argumentojnë qëndrimin e tyre ende në detyrë, duke thënë se postet që mbajnë nuk janë politike. Të ndodhur përpara kësaj situate, mësohet se grupi i punës që po monitoron reformën në administratë, i ka dërguar kryeministrit Edi Rama listën e drejtorëve që refuzojnë të dorëhiqen.
Kështu, sa i përket qarkut Gjirokastër, drejtuesit e LSI-së që pritet të shkarkohen janë; Spiro Diamanti, te Drejtoria Rajonale e Institutit të Sigurimeve Shoqërore; Koçi Rapi te Drejtoria Rajonale e Bujqësisë; Eri Ndreu te Drejtoria e Arkivës Gjirokastër; Filip Vito te Inspektoriati Shtetëror i Mjedisit dhe Pyjeve; Kristaq Xha te Bordi i Kullimit; Nikolla Buka te Ndërmarrja e Trajtimit të Studentëve dhe Ahmet Çabej te Drejtoria Rajonale e Tatimeve. Mirëpo një gjë është e sigurtë, të gjithë këta drejtorë do të largohen nga këto poste, vetëm pasi të miratohet buxheti i vitit 2018, në sajë të së cilit do të rishikohet edhe numri i punonjësve të administratës. Megjithatë se çfarë do të ndodh më konkretisht, le të presim ditët në vijim.
