Harta e veprave artistike në skulpturë, e derdhur në bronz historia e kombit tonë vjen e gjallë në filmin dokumentar “Jetë në Bronz” kushtuar skulptorit të popullit Mumtaz Dhrami. Financim i Qendrës Kombëtare të Kinematografisë dhe një produksion i shtëpisë Kinematografike “Cinemania film” me skenar dhe regji nga Petrit Ruka (Mjeshtër i Madh) erdhi para spektatorit në Tiranë premierë në kinema Millennium.
Regjisori i filmit Petrit Ruka tregon se u desh një punë serioze prej 9 muajsh, duke bërë mijëra kilometra nga Jugu në Veri, nga Gjirokastra e deri në Vushtri. Filmi ka një fotografi të bukur të natyrës shqiptare një mrekulli që të çlodh, kollona zanore e spikatur ku ka brenda dhe një pasazh të Mjeshtrit të Madh të pentagramit Aleksandër Lalo dhe nën mikrofonin e zërit të ngrohtë dhe plot elokuencë të Roland Roshit, që i sjell filmit një atmosfere artistike plot emocion. Përmes filmimeve, imazheve të gjalla zbulohen pak nga pak monumentet ku artisti Mumtaz Dhrami bashkë me kolegët e tij është autori i tyre.
Krahas artistëve të mëdhenj të këtij vendi ai krijoi hipotekën e tij të pavdekshme të historisë sonë kombëtare. Drejtor ekzekutiv i filmit Skënder Jaçe pohon se filmi me një gjuhë njerëzore plot elegancë nga pena e artë e mjeshtrit Petrit Ruka të rrënqeth, ai nxjerr në pah nëpërmjet personazhit mençurinë e popullit tonë, duke i bërë monumentet të dialogojnë duke rrëfyer historinë e kombit. “Sa hyjnor dhe tokësor ai bashkon historinë dhe personazhet e saj si në vdekje. Po citoj një moment nga teksti: Të gjithë rrinë bashkë në studion e tij, nuk grinden edhe pse jashtë bëhet batërdia e politikës,bindjeve të ndryshme, klasave të ndryshme”, shprehet Jaçe.
Të gjithë, Ismail Qemali apo Poradeci i lodhur, Shkurte Vata e brishtë dhe e pafaj apo Adem Jashari i hekurt dhe pa vdekje, Enver Hoxha i anatemuar apo Noli i lodhur nga mendja e gjerë e përkthimet, Preng Cali shtatlartë sa një bjeshkë, apo Mitrushi i butë që bën magjira me fjalën shqipe, koka rebele e pagjume e Dritëro Agollit apo kolegu Rama, që në këtë studio, dikur bënte shaka me skica djegëse intime e tani se lë allçia të zbresë që të punojë me shokun e tij. Asnjë nuk ankohet pse Mjeshtri Dhrami i ka ngjeshur bashkë sup më sup, në një vëllazëri të çuditshme, që vetëm në art dhe në vdekje është plot me paqe.
